يا الابيض انت امحقق الفوز دايم      انته الامارات الحبيبة وشعبها

منهو على مثلك يابو الليث رايم      لعبتك لعبة ما حد ٍ قد لعبها

حارسك مب نايم ولو كان نايم      عندك دفاع كل هجمة حجبها

أقوالك الحلوة ع خصمك جرايم      ولد الجدارة في البطولة ارتكبها

نيرانك ف ساحة خصومك ضرايم      جهدك على ندّك بالاصرار شبها

انته على بحر البطولات عايم      لك هاذي ميزة الله اللي وهبها

ما زال نصرك في البطولات قايم      والكاس فضتها ترى انت وذهبها

ألحقت خصمك بالفشل والهزايم      لك خيل جامح والصعايب وثبها

الملعب ايعزك وهو فيك هايم      والأرض انت ياللي بس منتخبها

شجعك جمهورك وهو كان صايم      واتحبك الكورة وانته تحبها

ياللي تصدّرت اللعب في القوايم      والنصر أمثاله بلعبك ضربها

شامخ إلى العليا شرات الغمايم      تمطر ع جمهورك ركايم سحبها

لعّيبتك صقر ٍ حواليك حايم      مب صقر إلا اصقور فوزك وظبها

أرست لك آساد العزايم دعايم      والريح انته اتعرف وجهة مهبها

اللي اجهلوا قدرك تراهم بهايم      والشمس لك يرجع حسبها ونسبها

جميع الحقوق محفوظة لــ موقع الشاعر رضا الهاشمي - عرندس الجفيان -- wWw.qafaj.cOm

http:/www.qafaj.com/