مدام الهجر في وجه الهوى جيتي وشهرتينه = عليج الله خشّي الهجر في قلبي وشريانه أموت بعزتي أبرك من قليب ٍ تذلينه = ولو عطشان ما اشرب ماي مختلفة به ألوانه يا مقسى غدرج الغاشم على قلبي تشنّينه = كما الطاغوت غدرج ما رحمتي القلب طغيانه أنا اتخبرج وش نوعج وش انتي ويش من طينة؟ = يا علقة وسط علقوم الغدر والزيف علقانة! لو انج تحسبين الليث يا الظبية تقودينه = ولا ف سابع حلم لا بوي خسرانة وغلطانة تراه هناك في العالي مقامي ما تشوفينه = مب انتي الشي ياللي القلب يتقطع على شانه فمان الله هذاك الباب يالله ما تقبضينه = ترى فرقاج هالمهجور يا مكثرها بيبانه عطيني ظهرج و سيري وقلبي لا تودعينه = ترى فرقاج فرّح خافقي واهله وجيرانه ترى اللي يشوفج بمكياج قال الله يا زينه = فقير الله ما يدري دنيّة ف خدّها دانة طريقج وانتي أدرى به تعرفينه وتدلينه = وانا لي صهوتي و سيفي وعزّي ونور ميدانه أشوف الدهر كثرت به عفاريته وشياطينه = واذا عن شكلج انتي ..ما اقول الا انتي شيطانه عطيتج قلبي وشفتج على غفلة تفرينه = وكلب الصدّ يلحس قلبي ويلعقه بلسانه! فقيد الأمة اقليبي علامج ما تناعينه = كأنه طفل قبره ظلم وأكفانه هي احضانه! واذا بفصخ لج انعالي.. خسارة.. ما تساوينه = يعز انعالي ولابسه لا والله لا هانه حليب اخداعج اللي من ثدي قلبج تدرّينه = قواطيه الكبيرة طلعت بفرقاج خربانة أنا جيتج بحر وشلون ما رمتي تسبحينه = ونفس الوقت لين الحين ما انتي فيه غرقانة! بعادج صح عدوان ٍ ولازم إني آدينه = ولكني المدين اللي شكر قلبج وعدوانه! اذا حبي بريح الغدر اختلت موازينه = ترى عادي أحب غيرج وأرجع وضع ميزانه واذا قلبي اتخذتينه كرة و رحتي تشوتينه = ترى عقلي جهلتينه يحب القفز ع الزانة! قليبي عاشرج شيخ ٍ جليل ٍ ما احترمتينه = قسيتي وانتي أدرى ليش فجأة طاحت أسنانه! لو إن الناس تسألني عن الوصل وعناوينه = بقول إلهم خذوا من مقبرة لفراق عنوانه أونج تقدرين الهجر والجفيان تقوينه = بشوف الحين يا إنتي ي آنه هيه نعم آنه عجيب افراقج اللي ما لقى دمع ٍ تصبينه = انا ما صحت! ليش الروح من فرقاج خرسانة؟! قليبج لو قسى لي ديني وله في الجفا دينه = إمام العز بي عايش وغدرج مات رهبانه! إذا قلبي عطاج ف يوم حبّ ٍ ما تحبينه = ترى مب مشكلة بكره بدوّر غيرج انسانة غياظ ٍ فيج أعيشها هوى ما يوم عشتينه = وغياظ ٍ فيج أسليها بوصالي يوم ملاّنة وغياظ ٍ فيج أبوس الراس من عقبي تبوسينه = واشغلج عدها بشكارة وادلعها يا تعبانة قسم بالله ياللي يحط في احداقها عينه = لا ادوسه دوس واحفر قبره اللي صار ف مكانه لا لبسها عناقيد العنب في جيدها زينة = وأطاعمها العنب في ثغر يشبه نصّ رمّانة هاذيج الغالية لي حسنها لا كان تحصينه = كما انجوم ٍ حلاها ضيّع الدوّار وأكوانه مفاتنها صعب الانسان يأتي بصدق تبيينه = كأنها إمرأة لعزيز لكن غير فتّانة! انا اتخيل اذا همّيت اذ همّت وبعدينه؟ = واذا كظت قميصي من دبر باقول سكرانة! أباها تسكر ف قلبي وتتراوده كل حينة = وألاعبها على فرعون يا هامان هيمانة! قسم بالله لا اكتب شعر واترسها دواوينه = واحبها كثر نوم الحلم في أجفان نعسانة واعزها كثر ما عز الصمد خاتم نبيينه = وارتلها قليبي يوم تغدو له كــ قرآنه على فكرة بقى لج شي واحد ما اخذتينه = خذي حبّ ٍ عرف كذبج على أعتاب بهتانه وقلبي هاذه اللي ما مداج انج تعرفينه = ترى أصبح شهيد ٍ ما اسقطت رايات عرفانه تعالي .. وين رحتي..شلّي هالذبانة ..الحينه = بعد ناقصنا من صوبج تجي بمهجرج ذبّانة

أدوات القصيدة

النسبة 2.77/5 (44اجمالي)

• 1
• 2
• 3
• 4
• 5